Ֆիլմեր Ա-Ֆ

Լոնջինոտտո, Քիմ

Քիմ Լոնջինոտտո (ծն. 1952, Լոնդոն)
Միջազգային համբավի տեր ռեժիսոր Քիմ Լոնջինոտտոն այսօր աշխատող ականավոր կինովավերագրողներից է, որը հայտնի է նրբազգացորեն ու կարեկցանքով ստեղծված իր մարդկային դիմանկարներով և վիճելի թեմաներով: Նրա ֆիլմերը միջազգային ճանաչման են հասել և տասնյակ մրցանակների արժանացել աշխարհի տարբեր կինոփառատոներում: Դրանց թվում են «Օր, որ երբեք չեմ մոռանա» ֆիլմին բաժին ընկած Amnesty International-ի DOEN մրցանակը Ամստերդամի վավերագրական ֆիլմերի ՄԿՓ-ում և Մեծ Բրիտանիայի լավագույն վավերագրական ֆիլմի տիտղոսը Hot Docs-ում, «Ամուսնալուծություն իրանական ձևով»-ին շնորհված Մեծ մրցանակը` լավագույն վավերագրական կինոնկարի համար Սան Ֆրանցիսկոյի ՄԿՓ-ում և «Արծաթե Հյուգոն»` Չիկագոյի ՄԿՓ-ում, «Անուրջների աղջիկների» լավագույն վավերագրական կինոնկարի համարումը Կրետեի կանանց ֆիլմերի փառատոնում, ակնառու վավերագրական կինոնկարի կոչումը, որ վաստակել է «Սինձուկուի տղաները» Սան Ֆրանցիսկոյի միասեռական ֆիլմերի փառատոնում: Լոնջինոտտոն օպերատորություն և ռեժիսուրա է ուսանել Անգլիայի ազգային կինոդպրոցում, որտեղ նկարահանել է «Բարձր դիրքը»` իր ուսումնական հաստատությանն ուղղված մի քննադատական հայացք, և «Թատրոնի աղջիկները»` անօթևան կանանց կացարանի մասին: Կինոդպրոցն ավարտելով` նա հեռուստատեսային տարբեր վավերագրական ֆիլմերի օպերատորն է եղել: 1986-ին Լոնջինոտտոն Քլեր Հանթի հետ հիմնել է Twentieth Century Vixen կինոընկերությունը: Միասին նկարահանել են «Հրդեհողը»` սըր Արթուր Ռմբակոծիչ Հարիսի և Երկրորդ աշխարհամարտի ժամանակ Դրեզդենի ռմբակոծության մասին, «Կեր կիմոնոն», որի հերոսուհին ճապոնացի վիճելի ֆեմինիստ արտիստուհի Հանայագի Գենսուն է, «Թաքնված դեմքերը»` միջազգային արձագանք գտած վավերագրական աշխատանք եգպտուհիների մասին ու նրանց մասնակցությամբ, և «Տոկիոցի լավ կինը»` ճապոնական հասարակության մեջ կանանց, սիրո և ամուսնության վերաբերյալ: Ջեյնո Ուիլյամսի հետ Լոնջինոտտոն նկարահանել է հանդիսասրահի համակրանքը շահած «Անուրջների աղջիկները»` BBC-ի թողարկած մի վավերագրական ֆիլմ` ճապոնական դիտարժան երաժշտական թատրոնի մասին, և «Սինձուկուի տղաները», որի հերոսները տղամարդկանց պես ապրող երեք տոկիոցի կանայք են: Այնուհետև Լոնջինոտտոն Channel 4-ի համար նկարահանել է «Ռոքի կանայք»` ռոք աստղերի կանանց և ընկերուհիների մասին, սրան հետևել է «Ամուսնություն իրանական ձևով» ֆիլմը` Զիբա Միր-Հոսեյնիի հետ, Իրանում կանանց վիճակի և ամուսնալուծության թեմայով: Ջեյնո Ուիլյամսի հետ նկարահանած «Գեայի աղջիկները» պատմում է ճապոնացի կին ըմբիշների մասին, դարձյալ Զիբա Միր-Հոսեյնիի հետ ստեղծված «Փախուստը» նկարահանվել է Թեհրանում, աղջիկների ապաստանում: «Օր, որ երբեք չեմ մոռանա» ֆիլմը` քենիացի երիտասարդ աղջիկների մասին է, որոնք ընդդիմանում են կնոջ թլպատմանը. առաջին անգամ ներկայացվել է ԱՄՆ-ում, 2003-ին, Սանդենսի ԿՓ-ում: «Իրավաբան քույրերը», որի պրեմիերան կայացել է Կաննում, երկու մրցանակի է արժանացել փառատոնում:

Ֆիլմացանկ
Անչափահասը (1982), Կեր կիմոնոն (1989), Տոկիոցի լավ կինը (1992), Անուրջների աղջիկներ (1994), Սինձուկուի տղաները (1995), Ռոքի կանայք (1996, հ/ֆ), Ամուսնալուծություն իրանական ձևով (1998), Գեայի աղջիկները (2000), Փախուստ, (2001), Օր, որ ես երբեք չեմ մոռանա (2002), Իրավաբան քույրերը (2005), Պինդ բռնիր ինձ, թող գնամ (2007), Կոպիտ մորաքույրեր (2008):

Այիզի, Ֆլորենս

Ֆլորենս Այիզի
Պրոդյուսերություն և ռեժիսուրա է ուսանել Լիդսի կինոյի և հեռուստատեսության հյուսիսային դպրոցում (Անգլիա): Քարդիֆցի սևամորթ բրիտանացի պարողի և բեմադրիչի մասին պատմող «Արտացոլքեր» վավերագրական կինոնկարի համառեժիսորն է: Կանանց միջազգային օրվա առթիվ նկարահանել է «Մայրս` Իսանժը» ֆիլմը: Գործնական պարապմունքներ է վարում Ուելսի համալսարանի միջազգային կինոդպրոցում (Նյուփորթ):

Ֆիլմացանկ
Արտացոլքեր (2003), Մայրս` Իսանժը (2005):