Ֆիլմեր Ա-Ֆ

Տուրտուրո, Ջոն

Ջոն Տուրտուրո (ծն. 1957, Բրուքլին, Նյու Յորք, ԱՄՆ):
Ժամանակի ամենափայլուն խարակտերային դերասաններից է, արդի ամերիկյան անկախ կինոյի անբաժան դեմքը: Սովորել է Յեյլի դրամատիկական դպրոցում: Առաջին անգամ նկարահանվել է 1980-ին Սկորսեզեի "Կատաղի ցուլը" գլուխգործոցում: Նույն տարի կայացել է նրա դեբյուտը Բրոդվեյում` "Շրջիկ գործակալի մահը" ներկայացման մեջ: Միանգամից աչքի է ընկել պիցցայատան մոլեռանդ աշխատակցի դերով Սփայք Լիի "Ճիշտ վարվիր" ֆիլմում (1989): 1991-ին Քոեն եղբայրների "Բարթոն Ֆինքի" գլխավոր դերակատարման համար Կաննի փառատոնում ճանաչվել է լավագույն դերասան: Հետագայում առաջատար դերերը հաճախակի չէին, թեեւ իր սցենարով նկարահանել է ու խաղացել "Մաք" սակավածանոթ ֆիլմի գլխավոր դերը` 1992-ին Կաննի փառատոնում լավագույն խաղարկային դեբյուտի համար արժանանալով "Ոսկե խցիկի": 1998-ին կրկին համագործակցել է Լիի եւ Քոենների հետ` նկարահանվելով համապատասխանաբար "Նա շահեց խաղը" և "Մեծն Լեբովսկին" ֆիլմերում: Դարավերջի նյույորքյան թատերախմբի կուլիսներում ծավալվող "Լուսավորյալը" կատակերգության սցենարի հեղինակը, ռեժիսորը, պրոդյուսերն ու գլխավոր դերակատարն է: 1999-ին Թիմ Ռոբինսի "Օրորոցը կճոճվի" ֆիլմում վերստին հայտնվել է նյույորքյան թատրոնում, մի ֆիլմ, որը քննում է արվեստի եւ քաղաքականության փոխհարաբերությունները 1930-ականների Նյու Յորքում:

Ֆիլմոգրաֆիա
Մաք (1992), Լուսավորյալը (1998), Սեր եւ սիգարետներ (2005):