Իրադարձություններ

Ավարտվեց “Ոսկե ծիրան” միջազգային կինոփառատոնի եւ Webtv.am ինտերնետ հեռուստատեսության նախաձեռնությամբ, ՎիվաՍել-ՄՏՍ ընկերության հովանավորությամբ 2011թ-ի նոյեմբերի 15-ին մեկնարկած “WebԾիրան” համահայկական առցանց կինոփառատոնը:
“WebԾիրան” կինոփառատոնի ընթացքում ցուցադրվեց տարբեր ժանրերի 49 ֆիլմ: Ֆիլմերից մեկը հեղինակի ցանկությամբ դուրս բերվեց մրցույթից:
Սահմանված էր 2 մրցանակ՝ 1000 ԱՄՆ և 500 ԱՄՆ դոլարին համարժեք դրամի չափով:
Հիմնադիրների որոշմամբ, մրցանակակիրները որոշվելու էին ինտերնետ քվեարկության արդյունքում:
Փառատոնի ողջ ընթացքում` նոյեմբերի 15-ից մինչեւ դեկտեմբերի 21-ը ներառյալ` 37 օրում, փառատոնին ներկայացված 49 ֆիլմերը դիտել են 42.032 անգամ:
Փառատոնի հիմնադիրների որոշմամբ՝ դեկտեմբերի 25-ին նախատեսված մրցանակաբաշխության արարողությունը հետաձգվեց:
Պատճառն այն էր, որ ինտերնետ քվեարկության ընթացքում ինչպես ֆիլմերի հեղինակների, այնպես էլ ենթադրյալ երկրպագուների կողմից ծրագրավորման տեխնիկական միջոցներով տեղի էին ունեցել որոշակի տեխնոլոգիական միջամտություններ քվեարկության գործընթացին, որոնք արձանագրված էին webtv.am ինտերնետ հեռուստատեսության կողմից:
Մեկ անգամ եւս քվեարկության արդյունքների տեխնիկական արձանագրությունների հանգամանալից ուսումնասիրությունից հետո, փառատոնի կազմակերպիչները, էական խախտումներ հայտնաբերելով՝ որոշեցին չեղյալ համարել ինտերնետ քվեարկությունը:
Փառատոնի կազմակերպիչների որոշմամբ կազմվեց մասնագիտական ժյուրի, որը եւ որոշեց հաղթողներին:
Գլխավոր մրցանակը և 1000 ԱՄՆ դոլարին համարժեք ՀՀ դրամը շահեց «Աշնան արև» ֆիլմը` ռեժ. Դիանա Կարդումյան:
Հատուկ մրցանակը և 500 ԱՄՆ դոլարին համարժեք դրամը կհանձնվի «Հատվող ճակատագրերի հանգրվանը» (The Dead Angle) ֆիլմին`ռեժ. Արսեն Այրապետյան:
Խրախուսական մրցանակներ կհանձնվեն` «Թեթև հպում»` ռեժ. Նարե Մկրտչյան, «Նախշոյի դպրոցը»՝ ռեժ. Գոհար Խաչատրյան, «Էն ուրիշ Ֆրունզիկը»՝ ռեժ. Հովհաննես Պապիկյան, «Օգնիր նրանց հիմա»՝ ռեժ. ԱրտՆերսես, «Bye-Bye»՝ ռեժ. Արեգ Մկրտչյան, Հրայր Լազյան, Աշոտ Հարությունյան:
Մասնագիտական ժյուրիի կազմը՝ Արա Խանջյան, կինոգետ Սիրանույշ Գալստյան, լրագրողներ`Գոհար Հակոբյան, Կարինե Ռաֆայելյան: Ժյուրիի նախագահ՝ կինոգետ Միքայել Ստամբոլցյան:
Ժյուրիի անդամների գնահատականների և ընդհանուր արդյունքների մասին կարող եք ծանոթանալ webtv.am կայքէջում:

ՏԵՍԱՕՐԱԳԻՐ

բոլոր հոլովակները...